វិស័យយុទ្ធសាស្រ្ត
វិស័យយុទ្ធសាស្រ្តទី១៖ ហេដ្ឋារចនាសម្ព័ន្ធដឹកជញ្ជូនប្រកបដោយចីរភាព
គោលបំណងនៃយុទ្ធសាស្រ្តនេះ គឺដើម្បីសម្របសម្រួលធនធានដែលមានស្រាប់ដើម្បីផ្តល់ការគាំទ្រដល់វិសាលភាពពេញលេញ នៃគម្រោងហេដ្ឋារចនាសម្ព័ន្ធដឹកជញ្ជូននៅកម្ពុជា រួមមាន៖ ការរៀបចំគម្រោង, ការកែលម្អផលិតភាពផ្នែកហេដ្ឋារចនាសម្ព័ន្ធ, និងការកសាងសមត្ថភាព ។ វានឹងដោះស្រាយនូវតម្រូវការជាក់លាក់ សម្រាប់គម្រោងហេដ្ឋារចនាសម្ព័ន្ធដែលមានគុណភាពខ្ពស់, ភាពធន់មាំនឹងការប្រែប្រួលអាកាសធាតុ, និងឆ្លើយតបទៅនឹងតម្រូវការរបស់សេដ្ឋកិច្ចឌីជីថល។
វិស័យយុទ្ធសាស្រ្តទី២៖ ភ័ស្តុភារកម្មវៃឆ្លាត (SMART LOGISTICS)
ការតភ្ជាប់នេះ បានកំណត់ជាមុននូវឧត្តមភាពភ័ស្តុភារកម្ម ប្រកបដោយសមត្ថភាពគ្រប់គ្រាន់និងភាពសម្បូរបែប, ពហុមធ្យោបាយ, បច្ចេកវិទ្យាទំនើបៗ, និងការដឹកជញ្ជូនប្រកបដោយប្រសិទ្ធភាពនិងភាពអាចជឿទុកចិត្តបាន។ បញ្ហាប្រឈមមួយក្នុងចំណោមបញ្ហាប្រឈមនានា គឺកិច្ចសម្របសម្រួល រវាងក្រសួង-ស្ថាប័នរបស់រាជរដ្ឋាភិបាល, ប្រតិបត្តិករវិស័យឯកជន, និងកង្វះការសិក្សាពីគ្នាទៅវិញទៅមកលើឧត្តមានុវត្តន៍។ មានកាលានុវត្តភាពមួយ ដើម្បីបង្កើតយន្តការនានា សម្រាប់គាំទ្រដល់កិច្ចសហការកាន់តែប្រសើរ ក្នុងចំណោមក្រុមហ៊ុនភ័ស្តុភារកម្មជាតិ និងអន្ដរជាតិ។ ប្រការនេះ នឹងជួយកំណត់នូវឧបសគ្គនានា ក្នុងចំណោមវិស័យសំខាន់ៗនៃខ្សែច្រវាក់ផ្គត់ផ្គង់ក្នុងតំបន់, ប្រមូល និងចែករំលែកនូវឧត្តមានុវត្តន៍ ស្តីពីរបៀបដោះស្រាយបញ្ហាទាំងនោះនៅក្នុងតំបន់, និងកំណត់នូវវិស័យគោលនយោបាយសំខាន់ៗ ដែលតម្រូវឱ្យមានការយកចិត្តទុកដាក់។ តាមរយៈភ័ស្តុភារកម្មវៃឆ្លាត (SMART Logistics) នឹងផ្តោតជាចម្បងទៅលើ (១) ការពង្រឹងរំហូរនៃការដឹកជញ្ជូនប្រកបដោយភាពរលូននៅតាមច្រករបៀងសេដ្ឋកិច្ចសំខាន់ៗ ចំនួន៣ គឺភ្នំពេញ-ក្រុងព្រះសីហនុ, ភ្នំពេញ- ប៉ោយប៉ែត, និងភ្នំពេញ-បាវិត (២) ការកាត់បន្ថយថ្លៃភ័ស្តុភារកម្ម (៣) ការផ្តល់សេវាកម្មភ័ស្តុភារកម្មប្រកបដោយភាពច្នៃប្រឌិតថ្មីទៅលើសេវាកម្មភ័ស្តុភារកម្មដែលមានស្រាប់។
វិស័យយុទ្ធសាស្រ្តទី៣៖ ការអភិវឌ្ឍធនធានមនុស្ស និងបច្ចេកទេសក្នុងវិស័យភ័ស្តុភារកម្ម
ប្រទេសកម្ពុជាចាំបាច់ត្រូវធ្វើឱ្យប្រសើរឡើងនូវធនធានមនុស្ស និងស្ថាប័នរបស់ខ្លួន ជាពិសេសនៅក្នុងតំបន់ដែលមានឱនភាពសមត្ថភាពច្រើនបំផុត។ សមត្ថភាពធនធានមនុស្ស គឺកាន់តែមានសារៈសំខាន់ក្នុងការកសាងជំនាញបច្ចេកទេស និងការគ្រប់គ្រងប្រតិបត្តិករភ័ស្តុភារជាតិ។
វិស័យយុទ្ធសាស្រ្តទី៤៖ ការពង្រឹងក្របខណ្ឌស្ថាប័ន និងគតិយុត្ត
បទប្បញ្ញត្តិរបស់ប្រទេសកម្ពុជាសម្រាប់សេវាភ័ស្តុភារកម្ម ចាំបាច់ត្រូវធ្វើទំនើបកម្ម និងបិទបញ្ចប់នូវគម្លាត និងភាពគ្មានសង្គតិភាពផ្នែកច្បាប់ និងបទបញ្ជានានា តាមរយៈការទទួលយកឧត្តមានុវត្តន៍ និងបទដ្ឋានអន្តរជាតិ។ ចាំបាច់ត្រូវបន្ថែមការអនុវត្តបទប្បញ្ញត្តិល្អៗ (GRP) ក្នុងការរៀបចំ, ការទទួលយក, ការអនុវត្តវិធាននានា, បទប្បញ្ញត្តិ, និងនីតិវិធីផ្សេងៗនៅក្នុងវិស័យនេះ។ គោលបំណងនៃយុទ្ធសាស្រ្តនេះ គឺដើម្បីគាំទ្រការអនុវត្តគោលនយោបាយសំខាន់ៗ ស្តីពីបែបបទនៃការដឹកជញ្ជូន និងភ័ស្តុភារកម្ម ជាពិសេសផ្តោតលើបទដ្ឋាន និងបទប្បញ្ញត្តិបច្ចេកទេសនានា ក៏ដូចជាការដោះស្រាយបញ្ហាផ្សេងៗ ជូនប្រតិបត្តិករដឹកជញ្ជូនប្រកបដោយវិជ្ជាជីវៈ។ បច្ចុប្បន្ននេះ មិនមានច្បាប់គោល ឬច្បាប់ដែលមានស្រាប់គ្រប់គ្រាន់ ដើម្បីគ្រប់គ្រងវិស័យដឹកជញ្ជូនតាមផ្លូវដែក, ផ្លូវគោក, និងផ្លូវទឹក។