មជ្ឈមណ្ឌលបណ្តុះបណ្តាល និងស្រាវជ្រាវភ័ស្តុភារកម្ម (ម.ប.ស.ភ)
មជ្ឈមណ្ឌលបណ្តុះបណ្តាល និងស្រាវជ្រាវភ័ស្តុភារកម្ម ត្រូវបានបង្កើតឡើងជាផ្លូវការនៅខែមករា ឆ្នាំ២០១៩ តាមរយៈប្រកាសលេខ ០០៥ ប្រក.សក ចុះថ្ងៃទី០៩ ខែមករា ឆ្នាំ ២០១៩។ ម.ប.ស.ភ. ដើរតួនាទីដ៏សំខាន់ក្នុងការរៀបចំកម្មវិធីសិក្សា និងវគ្គបណ្តុះបណ្តាលនានាពាក់ព័ន្ធនឹងវិស័យភ័ស្តុភារកម្ម។ ដោយមានរចនាសម្ព័ន្ធបែងចែកចេញជា ០៤ ផ្នែក៖ ផ្នែកកិច្ចការទូទៅ, ផ្នែកអភិវឌ្ឍកម្មវិធីសិក្សា និងវគ្គបណ្តុះបណ្តាល, ផ្នែកស្រាវជ្រាវ និងអភិវឌ្ឍ, និងផ្នែកព័ត៌មានវិទ្យា ទំនាក់ទំនង និងផ្សព្វផ្សាយ។
ក្នុងរយៈពេលកន្លងមកនេះ ម.ប.ស.ភ. មានវឌ្ឍនភាពដូចខាងក្រោម៖
- អគ្គនាយកដ្ឋានភ័ស្តុភារកម្ម ក៏ដូចជា ម.ប.ស.ភ. បានការបង្កើត Online Learning Platform ដោយទទួលបានការគាំទ្រផ្នែកហិរញ្ញវត្ថុពីវិស័យឯកជន ហើយកម្មវិធីបណ្តុះបណ្តាលតាមអនឡាញនេះ អាចដំណើរការទៅបានទាំងនៅលើកុំព្យូទ័រ និងទាំងនៅលើទូរស័ព្ទដៃ ក្នុងនោះផងដែរ ម.ប.ស.ភ បានសម្រេចចុះឈ្មោះ Domain Name ដែលមានអាសយដ្ឋាន www.logistics.gov.kh ដែលគ្រោងនឹងតភ្ជាប់ជាមួយគេហទំព័ររបស់ក្រសួងសាធារណការ និងដឹកជញ្ជូន។ ជាលទ្ធផលគម្រោងការនេះអភិវឌ្ឍបានជាង ៩៥% បើគិតមកត្រឹមថ្ងៃទី ២៧ សីហា ឆ្នាំ២០២១ និងកំពុងបន្តលើកិច្ចការបណ្តុះបណ្តាលដល់មន្ត្រីអគ្គនាយកដ្ឋានភ័ស្តុភារកម្ម ក្នុងការគ្រប់គ្រងលើ Platform ទាំងមូល។
- លទ្ធផលរំពឹងទុក៖ មជ្ឈមណ្ឌលគ្រោងនឹងរួមចំណែកអភិវឌ្ឍធនធានមនុស្សលើវិស័យភ័ស្តុភារកម្មជូនមន្ត្រីចំណុះអគ្គនាយកដ្ឋានភ័ស្តុភារកម្ម តាមបណ្ដាអង្គភាពចំណុះក្រសួងសាធារណការ និងដឹកជញ្ជូន ព្រមទាំងភាគីពាក់ព័ន្ធ តាមរយៈប្រព័ន្ធបណ្ដុះបណ្ដាលតាមអនឡាញដែលមានគុណភាព និងជំនាញវិជ្ជាជីវខ្ពស់របស់ថ្នាក់ជាតិ។